ទំនួញព្រហ្ម

ទំនួញព្រហ្ម

ព្រះព្រហ្មឈរយំនឹកស្រណោះ

ព្រហ្មយំព្រោះអស់ក្តីសង្ឃឹម

ទឹកភ្នែកជ្រែកភ័ក្រ្តធ្លាប់ញញឹម

ទុក្ខឥតអ្វីផ្ទឹមពេលនេះម្តង ។

ព្រហ្មវិហារធម៌ទាំងបួន

គិតថាមាំមួនអាចចម្លង

កូនស្ងួនឲ្យផុតក្តីមួរហ្មង

ដល់ត្រើយសុខផងលុះមរណា។

ឥឡូវមិនបានដូចការគិត

ព្រហ្មឈរអាណិតបុត្រសង្សារ

ឃើញកូនធ្លាក់ខ្លួនគួរអនិច្ចា

បង្កបញ្ហាក្នុងជីវិត ។

ឈ្លក់ល្បែងប៉ោបៀគ្នាគូរកន

វង់ល្បែងបារបនងប់ងងឹត

ងងល់វិលវល់ក្នុងគំនិត

ប្រព្រឹត្តទុច្ចរិតឥតពិចារ ។

កូនក្លាយជាមនុស្សបាតសង្គម

ទ្រូងម្តាយក្តៅងំក្រំខ្លោចផ្សារ

ដូចភ្នំសង្កត់លើឳរា

ខ្មាសញាតិកាក្នុងភូមិស្រុក ។

ទោះជាយ៉ាងណាក៏ដោយក្តី

ម្តាយក្នុងលោកីយឥតរើសមុខ

ប្រាថ្នាឲ្យកូនបានក្តីសុខ

រួចផុតចាកទុក្ខគ្រប់វេលា ។

ទោះម្តាយលំបាកក្រៃយ៉ាងណា

សូមកូនសង្សាររួចចាកពៀរ

រួចពីគំនិតគិតពាលា

ក្លាយមនុស្សជាអក្នុងសង្គម ។

ទឹកភ្នែកជន់ជោរហូរជោគភ័ក្ត្រ

សូមជួយពញ្ញាក់ចិត្តកូនខ្ញុំ

ឲ្យកែខ្លួនយ៉ាងសក្តិសម

ជួបក្តីសុខុមតរៀងទៅ ៕